ROXAS CITY – Pilas sa magkatuhay nga parte sang lawas ang naangkon sang 33-anyos nga lalaki, matapos ang nagluntad nga aksidente sa Brgy. Nasunogan, Dao, Capiz takna alas 7:30 kagab-i Setyembre 24, 2023.
Ginkilala ang biktima nga si Ruben Gando Dato-on, Driver kag residente sang Sambag Jaro, Iloilo, City, samtang ang ginatudlo suspek amu si Kenneth Rey Ebagat Espereto, 35-anyos kag residente sang Brgy. Ilaya, Dao Capiz.
Sandig sa impormasyon nga nagikan sa Dao Municipal Police Station, ginapahayag nga samtang ginasubay ni Dato-on ang dalan sa Brgy. Nasunogan sa nasambit nga banwa sakay ang Toyota vios, hinali na lamang nga ginbungguan ini sang kasugata nga motorsiklo nga ginamaneho ni Espereto kag ginapahayag nga nagpang-agaw ini sang linya sa dalan.
Bangud sa mabaskog nga impak, nagtabog kag nag-angkon sang magkatuhay nga pilas ang suspek nga gilayon naman ginpadangat sa Dao District Hospital para sa nagakaigo nga pagbulong.
Sa karun yara na ini sa estable nga kondisyon samtang, nagapadayon pa ang imbestigasyon sang mga kapulisan angut sa insidente.
