Kritikal ang kondisyon sang isa ka lalaki matapos nga naluthangan sa Barangay Malitbog, Tapaz, Capiz.
Ginkilala ang biktima nga si alyas Bodo nga residente sang nasambit nga lugar samtang ang suspek naman ang amu si alyas Dan, 39-anyos nga residente naman sang Barangay Gebio-an sa nasambit nga banwa.
Sa pagpakig-angut sang Bombo Radyo kay Police Chief Master Sergeant Rocer Garde sang Tapaz Municipal Police Station, ginapahayag nga nagpundo ang ginasakyan nga truck sang suspek sa isa ka tindahan rason nga ginsita ini sang biktima.
Ginaalegar nga may nagluntad nga pagbinaisay sa duha tubtob nga naggabot sang armas-luthang ang suspek kag gintiro ang biktima.
Nag-angkon sang tatlo ka igo sa magkatuhay nga parte sang lawas ang biktima nga gilayon man nga gindala sa ospital para sa nagakaigo nga pagbulong.
Samtang, nagapabilin naman nga at-large ang suspetsado. Sa karon nagapadayon ang imbestigasyon kag hot pursuit operation sang kapulisan angut sa nasambit nga insidente.
