Wala na sang kabuhi sang nakit-an ang isa ka lalaki sa Sitio Sto. niño, Barangay Lonoy, Roxas City.
Ginkilala ang lalaki kay Reynaldo Maximo, 36-anyos kag residente sang Brgy. Dumatad, Tangalan, Aklan.
Sa nakuha nga impormasyon sang Bombo Radyo nagikan sa Roxas City PNP, nakabaton ang mga ini sang tawag nagikan sa isa ka opisyal sa nasambit nga barangay nga nakit-an ang ini nga persona nga wala na nagaginhawa sa sulod sang puluy-an ni Efren Falco.
Nahibaluan nga nagpadulong ang amo nga persona sa balay ni Falco agud magkumpanyar kag antes nagtulog, nag inom-inom pa suno sila sang makahulubog nga ilimnon.
Sa tion nga ginapukaw na ini sang tag-iya sang balay, nakibot na lang ini nga wala na ini nagahulag.
Sa karon, yara na sa isa ka punerarya sa syudad ang bangkay sang nasambit nga persona kag ginahulat nalang sang mga kapulisan ang desisyon sang pamilya para sa nagakaigo nga disposisyon.
