Pilas ang naangkon sang 37-anyos nga lalaki matapos ginluthang sang iya kaupdanan sa ilimnan sa Sitio Lubog, Baranggay Damayan, Sapian, Capiz.
Ginkilala ang biktima kay alyas Omar, residente sang Brgy. Poblacion, Sapian, Capiz, samtang ang ginatudlo naman nga suspek ang ginkilala kay alyas Eric, 37-anyos kag residente sang Barangay Damayan, Sapian.
Sa interview sang Bombo Radyo kay PMSGT Louie Banate, imbestigador sang Sapian MPS, ginpahayag sini nga nakabaton ang mga ini sang impormasyon gikan sa isa ka barangay official nga may ginapahayag nga nagluntad nga shooting incident sa nasambit nga lugar.
Dugang pa sini, magkaupod nga naga-inum ang biktima kag suspek kag ang 6 nga iban pa. Sa tion nga papauli na kuntani ang biktima, ginpalukpan ini sang 12 gauge shotgun sang suspek rason nga nag-angkon ini sang kapilasan sa magkatuhay nga parte sang iya lawas.
Gilayon naman nga ginpadangat sa Mambusao District Hospital ang biktima samtang naghapatigayon naman sa karon ang mga kapulisan sang hot pursuit operation batuk sa suspek nga madasig nga nakapalagyo matapos nakumiter ang pagpang-luthang.
