Pilas sa mata kag natuo nga kamot ang naangkon sang isa ka 37-anyos nga lalaki matapos nalukpan sang “Baby kamara” sa Barangay Bungsi, Mambusao, Capiz.
Ginkilala ang biktima kay alyas “Ronald” kag residente sang nasambit nga barangay.
Sa nakuha nga impormasyon sang Bombo Radyo nagikan sa Mambusao Municipal Police Station, ginapahayag nga natabo ang insidente matapos ginpulot sang biktima ang nasambit nga palupok kag hinali nalang ini nga naglupok.
Nag-angkon sang pilas ang biktima sa mata kag kamot nga gilayon naman nga gindala sa Mambusao District Hospital agud mahatagan sang nagakaigo nga pagbulong.
Sa karon,yara na sa istable nga kondisyon ang nasambit nga biktima.
Mahibaluan nga base sa ginpaguha nga datos sang Capiz Provincial Health Office (PHO) may yara na sang 4 ka kaso sang fireworks-related injuries ang probinsya.
