Patay ang 38 anyos nga lalaki nga tumandok sang Ivisan matapos ginbuno sang iya kaugalingon nga tiyo sa Barangay Tabucan, Barotac Nuevo, Iloilo.
Ginkilala ang biktima kay alyas Jay, 38-anyos samtang ang ginatudlo nga suspek ang ginkilala kay alyas Bruno kag lunsay mga residente sang Ivisan, Capiz.
Sa interview sang Bombo Radyo kay PCpt. Cedric Cruz, hepe sang Barotac Nuevo MPS, ginpahayag sini nga samtang naga-inum-inom ang magtiyo sa ila Barracks hinali nalang may nagluntad nga komosyon sa tunga sang magtimbang nga bahin kun sa diin suno sa pahayag sang suspek, hinali nalang sya nga ginsumbag sang biktima.
Bangud sini, gilayon naman nga nagbalos ang suspek kag nagkuha sang kutsilyo kag ginbuno ang biktima sang tatlo ka beses nga nag-angkon sang tatlo ka patal nga pilas sa magkatuhay nga parte sang lawas rason sang iya kamatayon.
Nahibaluan nga yara sa idalom sang impluwenysa sang makahulubog nga ilimnon ang suspek sang matabo ang insidente.
Narekober naman ang hinganiban nga gingamit sa pagpangbuno sa ginluntaran sang insidente.
Samtang, magapangatubang sang kaso nga Homicide ang ginatudlo suspek.
Sa karon yara na si alyas “Bruno” sa kustodiya sang Barotac Nuevo MPS para sa nagakaigo nga disposisyon.
