ROXAS CITY – Nasapwan-patay ang isa ka 39-anyos nga lalaki matapos nalumos sa isa ka irigasyon sa Sitio A.A Barangay Aranguel banwa sang President Roxas.
Ginkilala ang biktima kay Anthony Berco Almario, care taker kag watchman sang “fishpond” ukon punong kag residente sang Brgy. Bantigue, banwa sang Pontevedra.
Sandig sa impormasyon nga nagikan sa Pres. Roxas PNP, personal nga nagkadto sa ila estasyon si Axel Chu, 27-anyos, checker sang fishpond kag ginsiling nga may yara sang nasapwan-patay nga lalaki sa nasambit nga Barangay.
Gilayon man ini nga ginrespondehan sang kapulisan kag nakuha ang lawas sang biktima sa bulig sang iya man mga katrabaho nga caretaker sa fishpond samtang nahibaluan nga ang mga trabahante sa nasambit nga fishpond ang nakadiskubre sa lawas sini nga nagalutaw kag wala na sang kabuhi.
Suno naman kay Ma. Julinda Belvis, live-in partner sang biktima, wala makapauli si Almario sa ila balay sumugod gab-i sang Biyernes bangud nag-inom ini kaupod sang iya mga abyan kag nagapati siya nga nalumos si Almario tuga sang kahulugbon.
Gindala pa sa Bailan district hospital ang biktima apang gindeklarar nga Dead on Arrival (DOA) sang doktor tuga sang pagkalumos.
