Nagpositibo sa drug test examination ang 39-anyos nga lalaki nga nadakpan sa ginpatigayon nga drug buybust operation sang nga katapo sang kapulisan sa Barangay 8, Roxas City, Capiz sang tinalikdan nga Disyembre 19, 2024.
Sa interview sang Bombo Radyo kay PCMS Ramil Arcangeles, tagpamaba sang Roxas City PNP, nag-abot na ang resulta sang drug test kag laboratory examination nga kun sa diin nag-positibo ini nga nagagamit sang droga.
Matandaan, narekober sa paghinakop ni alyas “Edefer” ang anom tanan ka sachets sang ginapatihan shabu nga may kabug-aton nga 13 ka gramos kag may standard drug price nga P88,400.00 kag P3,000 nga buy bust money.
Sa karon, nagapabilin ini sa kustodiya sang Roxas City Police Station para sa nagakaigo nga disposisyon kag natalana nga pasakaan sang kaso nga paglapas sa RA 9165 ukon Comprehensive Dangerous Drugs Act of 2002.
