Ginpabugal sang tagpamaba sang 3rd Infantry Spearhead Division, Philippine Army ang mga kadalag-an sang ila nga yunit sa pagtapna sa insurhensya sa rehiyon.
Sa interview sang Bombo Radyo kay Colonel Erwin Rommel P. Lamzon, Head sang Public Affairs Office sang 3rd Infantry Division sang Philippine Army, iya ginpahayag nga padayon nga naganubo ang numero sang mga aktibo nga miyembro sang New People’s Army (NPA) kag sa karon, ang nagkalabilin nga pwersa sang rebelde ang indi na maglapaw sa kinse (15).
Sa karon, ang sentro sang ila nga hubon amo ang pagpauntat sa mga remnants sang NPA kag pagkakas sang pagpamahog nga may kaangtanan sa terrorism financing.
Isa sa mga nagapanguna nga tikang sang 3rd Infantry Spearhead Division ang pagpalapnag sang outreach programs para sa mga anay rebelde kag mga komunidad nga apektado sang insurhensya.
Suno kay Lamzon, ang gobyerno padayon nga nagahatag sang nagapanguna nga kinahanglanon kaangay sang pagkaon, bulong, kag iban nga bulig sa mga suok nga naapektuhan sang mga kinagamo.
Magluwas diri, nakasentro man ang division sa mga tikang agud matapna ang recruitment sa mga kabataan kag kababayenhan sa mga grupo sang terorista sa diin nga suno kay Lamzon, may pila pa ka mga bahin sa rehiyon ang padayon nga nangin sentro sang recruitment ang mga rebelde nga grupo.
Kalakip sa mga estratehiya sang 3rd Infantry Division ang pagsuporta sa legal cooperation kag sectoral unification, nga tinutuyo nga mapaayo ang relasyon sang gobyerno kag sang mga lokal nga komunidad. Ang ini nga mga tikang ang nagatuyo nga maghatag sang mga oportunidad sa mga anay rebelde kag mga komunidad nga nagserbe nga base sang insurgency agud maghiusa kag maghugpong sa isa ka katuyuan para sa kalinong kag katawhay.
Sa kabilugan, ginpakita sang 3rd Infantry Spearhead Division ang ila nga dedikasyon sa pagdumala sang klinong kag katawhay sa rehiyon. Sa padayon nila nga pagsuporta sa mga inisyatiba para sa mga rebelde nga nagbalik sa sabak sang gobyerno, nagalaum sila nga mas madamo pa sang miyembro sang NPA ang magsurrender kag magbalik sa gobyerno agud mag-umpisa sang bag-o nga kabuhi.
Interviewed by Bombo Francis Biñas and Bombo Sunnie Mae Batencila
