ROXAS CITY – Handa ang apat ka mga Barangay Kagawad sang Barangay Liong, Roxas City nga indi na magpasaka sang kaso batuk sa ila Barangay Treasurer.
Ini ang nangin pahayag ni Kagawad Reynaldo Bacelonia sang Barangay Liong, Roxas City sang mainterview sang Bombo Radyo.
Mahibaluan nga nagpabalhag sang reklamo sanday Bacelonia kaupod sanday Richard Dillo, Enrique Cabantug kag iban pa nga mga opisyal sang barangay kag SK Chairman sang damlag lang matapos ginapahayag nga wala ginbayaran ni Armiel Duron Barangay Treasurer sang ila barangay ang P3,845.00 nga ila bulanan nga ginabayaran sa bangko.
Suno kay Bacelonia, nagsugod sila nga magbayad sadtong Agosto 1, 2021 kag magatapos kun tani sadtong Oktubre 20, 2022 kung sa diin nagkasugot ang mga ini nga ibuhin na lamang sa ila kada bulan nga honorarium.
Apang, ginkakibot sini nila sang makabaton sang demand letter nagikan sa bangko kung sa diin ginapahayag diri nga 3 pa lamang diri ka bulan ang ila nabayaran.
Bangud sini, gilayon nila nga ginpalab-ot sa ila Punong Barangay agud hibaluon kung ngaman ini natabo bangud ginabuhin man ang ila balayaran sa honorarium.
Ginpalab-ot man sang ila punong barangay suno kay Bacelonia kay Duron, kag nagtambong man ini sa ila ginpatigayon nga meeting agud sabton ang mga reklamo batuk sa iya.
Angut sini, aminado man si Duron nga gingamit niya ang kwarta sang iya kaupdanan bangud nagipit ini kag kinahanglanon niya sadto nga tion.
Mensahe ni Bacelonia kag kaupod sini nga mga barangay official nga kun tani atubangon na sa bangko ni Duron kag husayon agud indi na sila magpasaka sang kaso batuk diri, bangud ginapahayag nga indi na sila makahimo sang maayo nga tulog bangud sa kahadlok.
