ROXAS CITY -Nangin bukas ang apat ka mga katapu sang provincial board sa paghatag sang ila opinyon kag panindugan angut sa pila ka mga kontrobersiyal nga isyu nga ginadalahigan sang gobyerno probinsiyal.
Sa tumalagsahon nga kahigayunan, ekslusibo nga na-interview sang Bombo Radyo sanday board members Sonny Besa, Ricky Martin, Mat Hachuela kag Thea Faith Reyes kag nakuhaan sang ila sabat angut sa isyu sang scholarship program nga nagsanga sanga na matapos, ginkwestyon ang hinali nga pagdaku sang numero sang mga scholars sa idalum sang Del Rosario administration kag ang ginaalegar pagpatalang sang pila ka mga nagapalibot kay Governor Esteban Evan Nonoy Contreras.
Ginpahayag ni BM Thea Faith Reyes nga nasubuan ini bangud sa conflicting statement nga ginpaguwa sang malapit sa gobernador sa publiko nga kasubong ila ginapatalang ang mga pumuluyo.
Nagapati si Reyes nga indi dapat laktan sang pamulitika ang puturo ang mga kabataan, bangud diri nakasandig ang handum sang mga estudyante.
Ginapanindugan naman ni BM Hachuela nga indi depektibo ang scholarship programl ni anay Governor Antonio del Rosario, bangud ginsunod sini ang regulasyon sang Commission on Audit.
Wala man sang anomaliya sa educational assistance sang anay administrasyon kag nasantu ini sa pagsulundan sang COA, rason nga wala ginpauntat sang ahensiya.
Nagapati naman si BM Ricky Martin nga wala sang iregularidad sa nasambit nga programa kag pamatood diri ang wala pagpauntat sang Commission on Audit sa scholarship program sang Del Rosario administration, indi kapareho sang VIC Scholarship program nga ginakuha sa interes sang lending ang pondo para sa amo nga program nga isa ka paglapas sa pagsulundan sang COA.
Samtang suno naman kay BM Sonny Besa nga legal kag may balasehan ang scholarship program sang nagligad nga administrasyon nga kalakip sa annual investment plan sang gobyerno.
Ginapanindugan pa sini nga may supisyente nga pondo ang gobyerno probinsiyal agud masuportahan ang scholarship program.
Indi man lipod sa tanan nga prayoridad sadto ang social services sa diin luyag sang Del Rosario administration nga ma-institutionalized ang nasambit nga program nga gindihon para mabuligan ang mga estudyante nga luyag maka-eskwela.
