MAMBUSAO, CAPIZ– Madasig nga nakontrolar sang mga katapo sang Bureau of Fire Protection (BFP) ang sunog nga nagluntad sa apat ka mga establisyemento-komersiyal sa Barangay Poblacion Proper, Mambusao, Capiz.
Mahibaluan nga apat ka mga fire trucks ang nagresponde sa lugar nga ginalakipan sang Mambusao, Jamindan kag Sigma Municipal Fire Station agud mapalong ang kalayo.
Ginapahayag nga nagalab-ot sa P200, 000 ang kahalitan nga natuga sang amo nga sunog.
Sa apat ka mga establisyemento, duha diri ang totally-burned kag ang duha ang partially-burned.
Ang mga establisyemento nga gintupok gid sang kalayo ang ginapanag-iyahan ni Maria Labao nga isa ka sari-sari store kag carinderia nga ginapanag-iyahan ni Imelda Jarencio.
Samtang, partially-burned naman ang aluminum supply store nga ginapanag-iyahan ni Alma Evaresto kag burger stand nga gina-manager ni Mike Lopez.
Ginapahayag nga nagsugod ang kalayo sa establisyemento ni Labao kag madasig nga naglapta sa kaingud sini nga mga pwesto.
Padayon pa sa karon ang imbestigasyon sang mga otoridad agud matumod ang gintunaan sang nasambit nga sunog.
