ROXAS CITY – Ginlubog sa tubig baha ang pila ka mga kabanwahanan kasunod sang pagbubu sang mamunog nga ulan sa probinsiya sang Capiz.
Ini ang ginkompirmar ni Provincial Disaster Risk Reduction and Management Head Judy Grace Pelaez sang mainterview sang Bombo Radyo.
Mahibaluan nga apat ka mga kabanwahanan ang ginbaha kasunod sang pag-ulan nga ginalakipan sang banwa sang Tapaz, Dumalag, Sigma, kag Cuartero.
Suno kay Pelaez ginpahayag sini nga tatlo ka mga kabarangayan ang ginlubog sa tubig baha sa Tapaz nga ginalakipan sang Barangay Agpalali, Daan-Banwa kag Cristina, Ma-it Bridge sa Dumalag, Barangay Dayhagon kag Cogon naman sa banwa sang Sigma.
Gin-athag ni Pelaez nga lunsay mga kaumahan pa gid lamang ang ginlubog sang tubig baha sa mga nasambit nga lugar kag passable pa sa mga magagmay nga salakyan magluwas gid lamang sa Ma-it Bridge kag Cristina nga indi na maagyan sang mga magagmay nga mga salakyan.
Ginpasalig sini nga under control pa ang nasambit nga baha apang ginapaalerto na sini ang mga kaiping nga mga kabanwahanan bangud nagasugod na saylo ang tubig baha.
Samtang wala pa sang may napagkit nga nag-evacuate nga mga indibidwal kag wala man sang nareport sa talatapan nga may yara sang natabo nga landslide sa nasambit nga mga lugar.
Ginpasalig naman ni Pelaez nga magapabilin nga alerto ang tagsa ka mga mga MDRRMO sa pag monitor sa nasambit nga baha sa mga kabanwahanan sa probinsya.
