ROXAS CITY – Pilason ang apat ka mga persona sakay sa isa ka tricycle matapos nabungguan sang isa ka motorsiklo sa Barangay Cabugao, Roxas City.
Ginkilala ang driver sang trisikol nga si Eubegido Calunsi, 55 anyos, sakay ang pito ka sako sang bugas kag tatlo ka mga pasahero nga sanday Rizza Calunsi, 48 anyos, isa ka menor de edad, nga lunsay mga residente sang Barangay Jumaguicjuc, sining siyudad kag Roldan Cartujano, 48 anyos sang Barangay Lanot.
Suno sa imbestigasyon sang Roxas City PNP Traffic Section nga samtang ginasubay ni Calunsi ang dalanon sakay sa iya trisikol padulong sa syudad sang Roxas sang aksidente ini nga nabungguan sang motorsiklo nga ginamaneho ni Arca Bernas, 37 anyos sang Barangay Sta. Cruz, Ivisan nga nagresulta sang pagkatumba sang trisikol nga ginamaneho naman ni Calunsi.
Bangud diri, nag-angkon sang mga pilas sa magkatuhay nga parte sang lawas ang mga biktima nga gilayon gindala sa ospital agud dapatan sang nagakaigo nga pagbulong.
