ROXAS CITY – Pilason ang 4 ka miyembro sang pamilya matapos ginpanglabo kag ginpangbuno sa Sitio Agsasalong, Barangay Lucero, banwa sang Jamindan.
Ginkilala ang mga nagkalapilasan nga sanday, Lanela Villeza, 73 – anyos, kag mga kabataan sini nga sanday, Roger Villeza, 47 anyos, Richard Villeza, 46 anyos kag Ruel Villeza lunsay mga mangunguma kag residente sang nasambit nga barangay.
Samtang ang suspetsado ang ginkilala naman kay Rico Villeza, 45 anyos, himata man sang mga biktima.
Sandig sa imbestigasyon sang Jamindan MPS, naga-inom inom ang nasambit nga mag-ulutod sang hinali nalang nag-abot ang suspek kag ginpanglabo kag ginpang-buno ang mga ini nga nag resulta sang ila kapilasan sa lawas.
Nagtambag naman ang iloy sang mag-ulutod apang nadalahig ini nga ginlabo kag nag-angkon sang pilas sa iya kamot.
Lunsay ginpadangat sa Mambusao District Hospital ang mga biktima agud mahatagan sang nagakaigo nga pagbulong.
Samtang, nagsungka naman ang suspek sa mga nagresponde nga kapulisan kag ini ang ginaalegar nga may deperensya sa paminsaron.
Sa karun, nakustodiya na sa Jamindan MPS ang nasambit nga suspek para sa nagakaigo nga disposisyon.
