ROXAS CITY – Patay ang duha ka mga kostomer samtang ginabulong sa ospital ang duha ka iban pa matapos ginpangbuno sang tag-iya sang KTV bar sa Poblacion, Tapaz, Capiz.
Dead on arrival sang mag-abot sa ospital ang mga biktima nga sanday Alejandro Labrador sang Agpalali, Tapaz, Capiz nga nag-angkon sang pilas sa dughan kag kili kili, Richie Barnizo sang Daan Sur, Tapaz nga may pilas sa likod, tuhod kag tangkugo matapos ginpangbuno sang suspek nga si Robert Gamalando 60-anyos sang Bag-ong Barrio, Tapaz, samtang ginabulong sa ospital ang duha ka mga kaupod nga kostomer nga sanday Joven Parofil 25-anyos sang Barangay Roxas 8, Tapaz kag nag-angkon sang pilas sa nawala nga bahin sang abaga, Elemar Parofil nga nadalpisan sa tiyan.
Sa imbestigasyon sang Tapaz PNP nagaguwa nga nangin magahud na ang apat ka mga biktima nga magkaupod nga nag-inum sa nasambit nga KTV bar rason nga ginsita sila sang asawa sang suspek.
Apang hinali nga nagsinggit ang isa sa mga biktima tobtob nagsugod na ang kinagamo sa diin ginpangbuno sang suspek nga si Gamalando ang apat.
Madasig naman nga nagpalagyo ang suspek matapos ang krimen.
Padayon ang imbestigasyon sang mga pulis, sa diin ginapatihan nga indi lamang pagpangbuno ang natabo bangud may narekober nga tatlo nga slug sang .45 caliber pistol sa ginluntaran sang krimen.
