MAAYON, CAPIZ – Patay ang isa ka babaye matapos ginlabo sang iya utod nga lalaki sa Sitio Minoro Barangay West Villaflores, Maayon, Capiz.
Ginkilala ang napatay kay Jennelyn Lecsio Botis, 37-anyos, samtang ang nagkalapilasan amo sanday: Leah Lecsio Alcayde, 30 -anyos; Gilbert Lecsio Morallos, 48-anyos; lakip ang suspek nga si Jonilon Lecsio Morallos, 46-anyos nga lunsay mga residente sang Sitio Minoro, Brgy. West Villaflores, sa nasambit nga banwa.
Sa interview sang Bombo Radyo kay Punong Barangay Renante Contreras, nag-away ang suspek nga si Jonilon kag utod sini nga si Gilbert rason nga gintambagan sang duha nila ka utod nga babaye apang wala sang pagpangduha-duha nga nagkuha ang suspek sang binangon kag ginpanglabo ang iya mga utod.
Samtang, ginlampusan naman ni Gilbert sang matig-a nga butang ang suspetsado rason nga natumba ini.
Gilayon naman nga gindala sang ila mga himata ang mga biktima sa Bailan District Hospital para sa nagakaigo nga pagbulong apang gindeklarar nga dead on arrival si Jennelyn sang doktor nga nag-atendir samtang padayon naman nga ginabulong sanday Leah kag Gilbert.
Gindala naman sa Roxas Memorial Provincial Hospital ang nagpanglabo nga suspek nga si Jonilon.
Pahayag pa ni PB Contreras nga daan nga hiligut-anon ang rason sang pag-inaway sang mag-utod bangud masami sadto nga ginakastigo ni Jonilon ang napatay sini nga utod.
Sa karon, nagapadayon pa ang imbestigasyon sang katapo sang kapulisan angut sa nasambit nga insidente.
