BOMBO ROXAS – Nagapaligo sa kaugalingon nga dugo ang isa ka 40 anyos nga driver matapos ginlabo sa Barangay Capuyhan, Sigma, Capiz.
Ginkilala ang biktima kay Marlon Castillon sang nasambit nga lugar. Sandig sa inisyal nga imbestigasyon ni Police Master Sergeant Ronilo Arroyo, imbestigador sang Sigma Municipal Police Station nga samtang nagainom-inom ang biktima kaupod sang duha pa ka mga kaupdanan sa balay sang suspek nga si Erwin Jore, 45 anyos nga residente man sang nasambit nga lugar sang hinali nga nagpatunga ang wala pag-indihanay sa tunga sang duha ka mga nasambit nga persona.
Madasig nga nagkuha ang suspek sang matalum nga bagay kag ginlabo ang biktima kabangdanan nga nag-angkon ini sang magkatuhay nga kapilasan sa lawas.
Nagapabilin sa karon sa ospital ang biktima para sa dugang nga pagbulong samtang yara na sa karsel sang Sigma Municipal Police Station ang suspek.
Ginatutukan sa karon sang mga kapulisan ang dugang nga imbestigasyon angut sa nagluntad nga insidente.
