ROXAS CITY – Padayon nga ginabulong sa ospital ang 43-anyos nga mister matapos nga ginaalegar ginlampusan sang pala sa Barangay Linao, Panay, Capiz.
Ginkilala ang biktima nga si Rogeuil Bula sang amo nga lugar.
Matandaan nga sandig sa alegasyon sang biktima samtang nagalakat ini sa dalan agud magbakal kuntani sang posporo, gintawag ini sang suspek nga ginkilala nga si Edwin Bacero kag hinali nga ginlampusan ini sang pala sa tiil.
Gilayon naman nga gindala sang iya mga himata sa Roxas City Police Station ang biktima agud madapatan sang first aid sang mga katapo sang Bureau of Fire Protection.
Sa karon blanko pa ang biktima sa motibo sang suspek sa paglampus sa iya sang pala bangud wala man sang may nag-angkon nga indi pag-intiendihanay ukon daan nga hiligut-anon.
Mahibaluan nga namutikan nga yara sa idalom sang impluwensiya sang makahulubog nga ilimnon ang amo nga suspetsado.
