ROXAS CITY – Patay ang 47-anyos nga lalaki matapos nga wala na makabugtaw sang matulugan ini sa ilimnan sa Barangay Libon, Panay, Capiz.
Ginkilala ang biktima kay Richard Baselonia, nga residente sang Barangay Cabugao Oeste sa nasambit nga banwa.
Base sa impormasyon nga nagikan sa Panay Municipal Police Station, ginapahayag nga nag-inom-inom ang biktima kaupod ang lima sini nga abyan apang takna alas 7:50 naglisensya ini nga magtulog sa isa ka pulungkuan.
Apang makaligad ang pila ka oras, gintsekyar sang isa sini ka abyan ang biktima agud pukawon apang wala na ini nagasabat kag wala naman ini nagaginhawa.
Gilayon naman nga ginpadangat ang biktima sang iya mga abyan sa Roxas Memorial Provincial Hospital apang gindeklarar ini nga dead on arrival sang doctor nga nag-atendir.
Sa karon, nagapadayon pa ang imbestigasyon sang mga otoridad angut sa insidente.
