PRESIDENT ROXAS, CAPIZ – Patay ang 49-anyos nga lalaki matapos nga gintiro sa guwa mismo sang ila balay sa Sitio Tuyop, Barangay Carmencita, President Roxas, Capiz.
Ginkilala ang biktima nga si Noel Sanguillosa y Panes kag residente sang nasambit nga lugar.
Base sa imbestigasyon sang President Roxas PNP, samtang nagatindog sa guwa sang ila balay ang biktima kag may kaistorya sa cellphone sang hinali ini nga gintiro sang makapila ka beses sang wala pa matumod nga suspetsado.
Nag-angkon sang igo sang bala ang biktima sa dughan, abaga kag butkon nga gilayon man nga gindala sa ospital apang gindeklarar nga dead on arrival sang doktor nga nag-atendir.
Samtang, madasig naman nga nagpalagyo ang suspek sa wala mahibaluan nga direksyon sakay sa iya Rusi nga motorsiklo nga nagaduag pula.
Narekober sang kapulisan sa ginluntaran sang insidente ang walo (8 ) tanan ka basiyo sang ginaalegar caliber 9MM pistol.
Sa karon, nagapadayon pa ang imbestigasyon sang kapulisan sa nasambit nga insidente.
