Nakumpleto na sang Philippine Air Force kag Philippine Army ang lima ka adlaw nga joint military exercises – PAF-PA Interoperability Exercise (IOX) 03-24.
Umabot sa isa ka libo nga mga suldado gikan sa duha ka sangay sang Armed Forces of the Philippines (AFP) ang nagpakigbahin sa nasambit nga training.
Kalakip sa gin-agyan sang mga ini ang mga complex training scenario, Command Post Exercises (CPX), Subject Matter Expert Exchanges (SMEE), and Field Training Exercises (FTX), kag iban pa nga military training nga gindisenyo agud mapaayo pa ang joint combat and tactical operations sa tunga sang duha.
Ang lima ka adlaw nga pagsanay ang ginhiwat sa Camp Melchor F. Dela Cruz sa probinsya sang Isabela.
Ang nasambit nga kampo amo ang headquarters sang 5th Infantry Division kag isa sa mga bag-o nga Enhanced Defense Cooperation Agreement (EDCA) site.
