ROXAS CITY – Caught in the act nga nagagamit sang iligal nga droga ang lima ka mga persona sa ginpatigayon nga buy-bust operation sang Philippine Drug Enforcement Agency (PDEA-6) sa isa ka hulot sa Barangay Inzo Arnaldo, Roxas City.
Kalakip sa mga naaresto sanday Julius Cabanus sang Inzo Arnaldo, Joselito Boliver sang Barangay Tiza, Roxas City, Winces John Diaz 18-anyos sang Arnaldo Boulevard, Joshua James Bacud kag Clemente Andrade III sang Inzo Arnaldo Village.
Nakuha sa mga drug suspek ang 15 ka sachet sang ginapatihan shabu, P1,000 nga marked money, drug paraphernalia, cellphone kag P500 nga kantidad.
Samtang ginpanindugan ni Julius Cabanus, ang subject sa nasambit nga operasyon nga handa ini nga magpaidalum sa drug test agud pamatud-an nga wala sila nagagamit sang iligal nga droga kag nagainum lamang sang mga kaupdanan sang mag-abot ang mga otoridad.
Pasakaan sang kaso nga paglapas sa RA 9165 ukon Comprehensive Dangerous Drugs Act of 2002 ang mga drug suspek.
