IVISAN CAPIZ – Naglab-ot sa 5 ka mga panimalay ang apektado sang landslide bangud sa mamunog nga ulan kahapon sa Barangay Cabugao, Ivisan Capiz.
Matandaan nga bangud sa malain nga tyempo kag segi-segi nga pagbubo sang ulan pila ka mga lugar sa probinsya ang ginbaha kag nagtiphag ang duta.
Sa interview sang Bombo Radyo kay Nanay Editha, isa sa mga apektado sang landslide ginpahayag sini nga natabo ang insidente takna alas 8:00 sang aga kag nagikan sila sa dagat agud magpauli bangud sa mabaskog nga ulan.
Suno kay Nanay Editha, hinali lamang nila nabatyagan nga nagadul-os na ang duta kag may dala nga mga bato.
Bangud sini, gilayon sila nga naguha sa ila tagsa ka mga puluy-an kag gintsekyar ang importante nga mga kagamitan.
Gilayon man sila suno kay Nanay Editha nga ginpalapitan sang ila mga Barangay Officials agud hibaluon ang ila sitwasyon subong man gintan-ayan sang mga foodpacks bilang bulig.
