ROXAS CITY – Tuman ang kalipay nga nabatyagan sang 50 tanan ka mga buluthuan, matapos nga makabaton sang 55 inches smart televisions pinaagi kay Capiz Governor Fredinel “Oto” Castro nga nagikan sa Special Education Fund sa idalum sang Department of Education (DepEd).
Sa interview sang Bombo Radyo kay Dr. Miguel Mac Aposin DepEd Capiz Division Superintendent, ginpahayag sini nga para pa lamang sa elementary level ini partikular sa mga kindergarten.
Tinutuyo sini agud mangin mahapos sa mga estudyante, ang ila pagtuon subong man sa mga manunudlo kag makatupong sa subong nga moderno nga panahon.
Suno kay Aposin, pauna pa lamang ini kag nagalaum nga madugangan pa agud mahatagan man ang iban pa nga mga grade level.
Sa pihak nga bahin, padayon sa gihapon suno diri ang pagbantay kag pagmonitor sang ahensya sa tagsa ka mga school canteen agud siguraduhon nga masustansya ang ginabaligya sa mga estudyante.
