Nagtakop na ang una nga adlaw sang confirmation of charges hearing batok kay Former President Rodrigo Duterte.
Sa pag-umpisa sang confirmation of charges hearing, gin-athag ni Pre-Trial Chamber I Presiding Judge Iulia Motoc nga indi sila ang magadesisyon kun may sala ukon inosente si Duterte.
Sa una nga bahin sang session, gin-isa isa sang International Criminal Court (ICC) Pre-Trial Chamber I ang tatlo ka mga crimes against humanity charges batuk kay former President Rodrigo Duterte sa iya nga confirmation of charges hearing.
Lakip diri amo ang masunod;
Ang una nga kaso batok kay Duterte nakasentro sa ginaalegar involvement sini bilang co-perpetrator sa 19 murders nga ginpanghimo sa tunga-tunga sang 2013 kag 2016 samtang siya ang mayor sang Davao City.
Sa ikaduha nga kaso, gin-angot naman si Duterte sa 14 murders sang “High Value Targets” sang 2016 kag 2017 sang siya na ang presidente sang Pilipinas.
Sa ikatatlo nga kaso, covered ang 43 murders nga nakomiter kadungan sang “clearance” operations sang lower-level alleged drug users ukon pushers sa Pilipinas sa tunga-tunga sang 2016 kag 2018.
Nag-deliver man sang opening statement si ICC Deputy Prosecutor Miandaye Niang samtang gina-present sini ang overview sang ebidensya batuk kay former President Rodrigo Duterte may kaangtanan sa drug war sang anay presidente.
Sa iya opening statement, iya ginpahayag nga ang numero sang murders nga nalakip sa mga kaso ni former President Rodrigo Duterte lakip na ang 49 ka mga specific incidents sang murder kag attempted murder nga may 79 ka mga biktima, ang sample lamang ang systematic attacks nga natabo kadungan sang war on drugs.
Gin-mention man sang ICC Prosecution ang promisa ni Duterte nga patyon sini ang mga drug users kag criminals.
Para kay ICC Deputy Prosecutor Mandiaye Niang, ang pagsugod sang confirmation hearing sa kaso ni former President Rodrigo Duterte ang nagaserbe nga pahanumdom sa commitment sang korte nga mag-imbestigar sa mga indibidwal nga involved sa seryoso nga mga krimen.
Apisar nga indi man mabalik sang International Criminal Court ang mga napatay sa drug war sa ila pamilya, mahimo man ini nga magserbe nga pamaagi agud mahatagan sang hustisya ang mga biktima.
Nagalaum ang mga himata sang mga biktima nga pinaagi sa proseso sa korte, mapanabat ang mga involve sa ginaalegar human rights violations.
Gintapos man sini ang iya opening statement paagi sa matigdas nga mga tinaga kun ngaa dapat manabat si former President Rodrigo Roa Duterte kag kun ngaa dapat ipasaka ang kaso sini sa trial stage.
Samtang, naghatag man sang opening statement si Atty. Joel Butuyan, isa sa mga legal representative sang mga biktima sang war on drugs sa Pilipinas.
Suno kay Butuyan, sila mismo nga mga abogado nakabatyag nga daw ginahimo sila nga mga kriminal sang pila ka mga Pilipino sa gwa sang pungsod nga nagasuporta kay Duterte.
Bisan ang mga hukom sang ICC, suno sa iya, wala nakaluwas sa online harassment sang ginatawag niya nga Duterte clones, nga nagadugang sang kahadlok kag kabudlayan sa mga biktima.
Ginhatagan pagtamod ni Butuyan, nga madamo sa gihapon ang nahadlok magpakigbahin sang ila eksperyensya angut sa ginapahayag mga krimen ni Former President Rodrigo Duterte.
Pahayag pa niya, ginakahadlukan man sang pila ka mga biktima sang “war on drugs” nga mahimo sila mangin target sang kalakasan kun magtestigo sila batok sa anay presidente.
Pagkatapos sang una nga session, Nagsugod naman sa paghatag sang opening statement ang defense team ni former President Rodrigo Duterte sa ikaduha nga session, sa pagpanguna ni Atty. Nicholas Kaufman, sa confirmation of charges hearing sang International Criminal Court (ICC).
Ini ang angot sa crimes against humanity charges batok sa anay Presidente.
Ginpamatukan ni Kaufman ang mga pahayag sang common legal representatives para sa mga biktima sang drug war.
Ginpakamalaut man ni Kaufman, si President Ferdinand Marcos Jr bangud sa gina-alegar wala pagtuman sang promisa sini nga indi magbulig sa ICC sa pagdakop kay Duterte.
Suno kay Kaufman, kabahin sang depensa ang panan-awan nga hungod nga ginpili ni Marcos nga indi magpasilabot sa kaso agud mapreserbar ang legasiya ni Duterte.
Sa ikatatlo nga session, ginpresentar sang Prosecution ang nagkalain-lain nga kaso sa ginaalegar pagpatay sa tion sang administrasyon ni Duterte.
Lakip na ang nagkalain-lain nga mga laragway kag videos ni Former President Duterte.
Kon sa diin makit-an sila ni Senator Bato Dela Rosa nga magka-upod kag may hawid nga armas.
Ginpangalanan man ni ICC Senior Trial Lawyer Julian Nicholls ang mga personalidad nga ginakabig co-perpetrator ni Duterte sa war on drugs nga amo sanday Sen. Ronald “Bato” dela Rosa, Sen. Bong Go, anay DOJ Sec. Vitaliano Aguirre II, anay Davao City Police chief Vicente Danao kag anay NBI chief Dante Gierran sa confirmation hearing sang ICC Pre-Trial Chamber I.
Maga-resume naman subong nga adlaw Pebrero 24, ang hearing kag pagasundan sang proceedings sa Huwebes kag Biyernes.
