Gin-aprubahan sang Bangsamoro Autonomous Region in Muslim Mindanao (BARMM) ang bag-o nga wage order nga nagataas sang P50 sa adlaw-adlaw nga sweldo sang mga mamumugon sa pribado nga sektor umpisa sa masunod nga bulan.
Sa isa ka pahayag, ginpahayag ni BARMM Chief Minister Abdulraof Macacua nga iya gin-aprubahan ang Wage Order No. BARMM-04 sang Huwebes, nga mangin epektibo 15 ka adlaw matapos ini mabalhag sa isa ka pamantalaan nga may sirkulasyon sa rehiyon.
Ginpahayag ni Minister Muslimin Sema sang Ministry of Labor and Employment (MOLE) sang BARMM, nga amo man ang chair sang Bangsamoro Tripartite Wages Productivity Board (BTWPB), nga ang wage order igapatuman sa bug-os nga rehiyon, magluwas sa mga mamumugon nga gin-exempt sang kasuguan, pareho sang mga domestic workers kag sadtong yara sa mga rehistrado nga microenterprises.
Ginpirmahan ni Macacua kaupod ang mga katapo sang BTWPB ang wage order sa ginhiwat nga seremonya sa MOLE-BARMM regional office sa Cotabato City sadtong Huwebes.
Suno kay Sema, ang pagtaas sang sweldo bilang sabat sa nagataas nga gasto sa pagpangabuhi, inflationary pressures, kag padayon nga panawagan sang mga labor groups para sa mas makatarunganon nga sweldo.
Para sa mga mamumugon sa Maguindanao del Norte, Maguindanao del Sur, Lanao del Sur, Basilan, Sulu, Tawi-Tawi, kag sa mga syudad sang Marawi kag Lamitan, mangin P386 ang bag-o nga minimum wage para sa mga non-agricultural workers gikan sa P336. Ang adlaw-adlaw nga sweldo sang mga agricultural workers magasaka sa P376 gikan sa P326.
Samtang ang mga mamumugon sa BARMM Special Geographic Areas (SGA) ang may minimum wage increase sa P391 gikan sa P341 para sa mga non-agricultural workers. Ang mga yara sa agricultural kag retail sector ang magabaton sang adlaw-adlaw nga sweldo nga P366, gikan sa nagligad nga P316.
