ROXAS CITY – Natigayon na nga mabalik ang 51 ka mga rescue vehicle nga una na nga ginpanghatag sa mga kabarangayan sang administrasyon ni Contreras sa Provincial General Service Office (PGSO).
Ini ang ginkumpirmar ni Mr. Eduardo Boy Apaap, hepe sang PGSO sang mainterview sang Bombo Radyo.
Suno diri, 56 ka mga rescue vehicle ang ginalauman nga mabalik kag ginahulat na lamang ang 5 pa ka unit sang salakyan nga igaturn-over sa ila opisina agud makahatag na ini sang final nga report sa Sanggunian.
Ang nasambit nga mga salakyan ang nahamtang sa kilid sang Capiz Gymnasium.
Matandaan nga ginbawi sang provincial government ang mga “rescue vehicle” nga ginpanghatag sa mga kabarangayan agud mapatigayon ang insakto nga pag turn-over, mahatagan sang Memorandum of Agreement (MOA), guidelines sa operation kag maintenance, kag mga dokumento nga magaserbe sa opisyal nga mangin propedad sang kabarangayan.
Suno kay Apaap nakadepende sa Sanggunian kun ano ang masunod nga tikang kun makumpleto na ang mga salakyan nga igaturn-over.
