Naglab-ot na sa 529 ang kabug-usan nga numero sang mga aksidente sa dalanon nga nabalhag subong nga holiday season.
Suno sa Department of Health (DOH), ang nasambit nga numero, nga ginakalakipan sang 33 ka panibag-o nga kaso ang na-record sumugod Disyembre 22 tubtob 6:00 AM sang Enero 1, 2025.
Base sa datos, mas mataas ini sang 31% kun ikumparar sa nalista sa kapareho nga period sang nakaligad nga tuig.
Sa kabug-usan naman nga numero sang road accidents, 383 ang ginakaulamiran sang mga motorsiklo kag 94 nga naaksidente ang nakainom sang makahulubog nga ilimnon, samtang 459 ang wala naggamit sang safety accessories.
Pahayag pa sang DOH, ang mga nasambit nga aksidente ang nagresulta sa kamatayon sang anom ka indibidwal, kalakip ang apat nga ginbawian sang kabuhi bangud sa motorcycle accident.
Liwat nga ginpanugyan sang DOH sa publiko nga masami nga magsuksok sang helmet kag seatbelt kun magsakay sang motorsiklo ukon anuman nga sahi sang behikulo.
Kun nakainom man sang alak, dapat nga likawan ang pagmaneho agud makalikaw sa aksidente.
Dugang pa sang DOH, dapat man nga sundon sang mga drivers ang speed limits kag road signs, kag siguruhon nga may bastante nga tulog antes magmaneho.
Panugyan pa sang DOH, sa tion nga mag-angkon sang emergency sa karsada, mahimo suno diri nga magtawag sa 911 emergency hotline ukon 1555 DOH emergency hotline.
