Naglab-ot na sa 54 ka mga Pilipino sa Israel ang naghingyo sang repatriation sa tunga sang nagapadayon nga nagalala nga inaway sa Middle East.
Suno kay Philippine Ambassador to Israel Aileen Mendiola, may yara sang 32 ka mga turista kag 22 ka mga overseas Filipino workers (OFWs) ang nagpabutyag sang handum nga makapauli sa Pilipinas.
Suno sa Ambassador, isa na ka hangkat subong ang pagsaylo sa ila bangud wala sang flights pakadto kag pabalik sa Israel kag sirado ang iban pa nga land crossings.
Apang, suno sa siya plano nga unahon ang mga turista nga na-stranded bangud wala sila sang puluy-an didto, gani naga-coordinate ang embahada sa Israeli Ministry of Tourism agud nga ma-evacuate ang mga ini.
Ini man ang ginakabig nga pagpanghangkat sa pagdala pabalik sa Pilipinas sang bangkay nga lawas sang napatay nga Filipina caregiver sa Israel nga si Mary Ann Velasquaez de Vera.
Sa subong, imposible nga mapabalik gilayon ang bangkay sang pinay, apang suno sa iya, ginaistoryahan na sang ila mga team members kon paano ini mapabalik sa pungsod kaupod ang bana sang Filipina caregiver nga yara man sa Israel kag ang iya utod sa Qatar.
Base sa datus sang Department of Foreign Affairs (DFA), may yara sang 2.5 milyon ka mga Pinoy sa Middle East kun sa diin kalabanan ang yara sa United Arab Emirates (UAE), Saudi Arabia kag Qatar samtang may 800 naman sa Iran.
