ROXAS CITY – Pilason ang 55-anyos nga mister matapos nga ginluthang sang 41-anyos nga lalaki sa guwa sang binaylehan, sa Barangay Nagba, Cuartero, Capiz, kaina sang kaaganhon.
Ginkilala ang biktima kay Ruel Apolinario, samtang ang suspek amu si Raffy Patiño, lunsay mga residente sang amu nga lugar.
Sandig sa inisyal nga imbestigasyon sang katapo sang Cuartero Municipal Police Station, nga nagkit-anay ang duha sa guwa sang binaylehan kag nagtulokay, sang hinali nalang nga nagkuha sang ginaalegar .45 calibre nga armas luthang si Patiño kag ginluthang si Apolinario.
Naigo sa ilong lapus sa tutunlan, ang naangkon nga pilas sang biktima.
Nagaguwa sa imbestigasyon nga daan nga hiligut-anon ang motibo sa insidente.
Natigayon man nga maaresto ang suspek kag sa karon yara sa kustodiya sang Cuartero MPS, para sa nagakaigo nga disposisyon.
