ROXAS CITY – Ginhatagan sang puntos ni Capiz 1st District Representative Emmanuel Tawi Billones Sr., si Presidente Rodrigo Duterte sa iya sini ika-lima nga State of the Nation Address ukon SONA.
Sa interview sang Bombo Radyo kay Billones gikan sa 10 puntos naghatag ini sang 7 puntos para sa pasado kag 3 puntos naman para sa indi pasado nga mga panaysayon nga ginprisentar sang Presidente.
Suno kay Billones nga halos maayo ang panaysayon sang nasambit nga presidente para sa katapusan sini nga termino sa pagpangalagad sa pungsod.
Apang, indi lamang kumbinsido si Billones bangud wala sini nabatian sa SONA sang presidente ang nagakaigo nga road map sa pagbulig sa nagkalain-lain nga mga sektor nga apektado sang Coronavirus Disease ukon COVID-19 Pandemic.
Apang sa pihak sini, suportado sa gihapon ni Billones ang pila ka mga ginaduso sang Presidente sa masunod nga mga binulan.
Kapareho na lamang sa pagpapasar sang “Bayanihan to Heal As One Act Two” nga makabulig sa mga Filipino nga tuman naapektuhan sang pandemya sa pungsod.
Suportado man ni Billones ang plano nga pagpasarado sang presidente sa duha ka mga dalagkuan nga telecommunication companies sa tion nga indi mangin maaayo ang serbisyo sa publiko.
Apang, wala lamang naluyagan sang opisyal ang ginaduso ni Pres. Duterte nga liwat ibalik ang death penalty pinaagi sa lethal injection sa mga indibidwal nga magalapas sa laye nga Comprehensive Dangerous Drugs Act of 2002.
