Nakabalik na punsod ang anum sa 17 ka mga Filipino crew members sang nalugdang nga MV Magic Seas matapos gin-atake sang mga rebelde nga Houthi sang Lunes, Hulyo 7.
Nag-abot ang mga ini sa Ninoy Aquino International Airport (NAIA) kag Clark International Airport subong nga adlaw, Huwebes, Hulyo 11.
Suno sa Department of Migrant Workers (DMW), tatlo sa mga marinero ang nagdungka sa NAIA mga alas 4:30 sang hapon. kag ginsugat sang mga tiglawas gikan sa DMW kag MIAA Medical Team.
Kalakip sa mga nag-abot sa NAIA amo ang Chief Officer, 2nd Officer, kag 3rd Officer sang barko. Samtang, tatlo pa ka mga tripulante, kalabanan mga enhinyero, ang naghugpa sa Clark International Airport sa amo man nga tion.
Bilang bulig, nakabaton ang mga seafarers sang tag-P75,000 gikan sa DMW-AKSYON Fund kag Overseas Workers Welfare Administration (OWWA) Emergency Repatriation Fund, kag dugang nga P10,000 halin sa DSWD.
Nagpaidalom sila gilayon sa medikal nga eksaminasyon.
Ginpasalig ni DMW Assistant Secretary Francis Ron De Guzman nga magapadayon ang suporta sang gobyerno, sandig sa mando ni Presidente Ferdinand Marcos Jr., agud mabuligan ang mga marinero sa ila reintegration.
Naghatag man sang temporaryo nga hotel akomodasyon kag transportasyon ang OWWA agud masiguro ang ila luwas nga pagpauli sa ila pamilya.
