Nag-umpisa na subong nga Lunes, Setyembre 1, ang 60-ka adlaw nga suspensiyon sa pag-angkat sang bugas sandig sa Executive Order No. 93 nga ginpirmahan ni Presidente Ferdinand Marcos Jr. sa diin nagatuyo nga maproteksyunan ang lokal nga mangunguma subong nga tion sang tig-alani.
Sakop sang suspensiyon ang regular kag well-milled rice, samtang wala naman nalakip ang ang specialty rice varieties nga wala gintanom sang mga lokal nga mangunguma.
Suno sa Department of Agriculture (DA), ang amo nga tikang mahimo nga makabulig nga malikawan ang pagtibusok sang presyo sang humay sa merkado. Nahibaluan nga una na nga gin-anunsyo sang Presidente ang rice import ban matapos ang iya nga state visit sa India sang Agosto 6. Apang, antis pa man ini, nagnubo ang presyo sang humay tubtob P8 kada kilo bangud sa pagdamo sang imported rice, rason agud mapyerde ang madamo nga mangunguma.
Samtang, mahimo nga palawigon ukon palip-uton ang suspensiyon depende sa mangin rekomendasyon sang Department of Agriculture (DA), Department of Economy, Planning, and Development (DEPDev), kag Department of Trade and Industry (DTI).
Sa idalom sang Republic Act 12078, Section 3, may yara sang gahom ang Presidente nga magpatuman sang suspensiyon sa importasyon sang bugas kun may sobra-sobra nga suplay nagikan sa iban nga pungsod. Kadungan sini, ginmanduan ang Deprtment of Agriculture kag Department of Trade and Idustry nga magtukod sang maathag nga guidelines kag mekanismo para sa pagpatuman sang nasambit nga kasuguan.
