Ginabanta nga magalab-ot sa kabug-usan nga 674,000 pasahero ang magabalik sa nagkalain-lain nga pantalan sa bug-os nga Pilipinas subong nga Biyernes, Enero 3 tubtob sa Dominggo, Enero 5, suno sa Philippine Ports Authority (PPA).
Ini ang kasunod sang pagbalik sang mga Pilipino nga may trabaho kag magabalik man sa mga eskwelahan pagkatapos sang mahaba nga bakasyon sa ila tagsa ka mga probinsya.
Sa isa ka pahayag, ginsiguro ni PPA General Manager Jay Daniel Santiago sa publiko nga tapos na ang mga kinahanglanon nga preparasyon para sa ginalauman nga pagdugok sang mga pasahero.
Ginsambit man sini nga ang mga tinawo sang PPA ang naka-high alert kag tanan nga leave of absence ang nakanselar agud masiguro ang bastante nga numero sang mga empleyado sa mga pantalan.
Lauman ang yara sa masobra 3,000 PPA personnel ang igapalapta sa bug-os nga pungsod, nga naka-focus sa mga dalagkuan nga pantalan kasubong sang Batangas, Bohol, Davao City, Negros Oriental, kag Bicol.
Ginpasangkad man ang seguridad kasubong sang pag-deploy sang K-9 units, pagtukod sang mga help desks, kag pagbantay sang mga pantalan gamit ang CCTV systems.
Suno sa datos sang PPA, halin Disyembre 15, 2024, tubtob Enero 2, 2025, naglab-ot na sa 3.6 million nga pasahero ang nag-agi sa ila mga pantalan.
Ginalauman sang PPA ang kabug-usan nga 4.58 million nga pasahero halin Disyembre 15, 2024, tubtob Enero 5, 2025, mas mataas kun ikumparar sa nakaligad nga tuig nga naglab-ot lang sa 4.36 million nga pasahero.
