Patay ang yara sa 61 ka indibidwal sa isaka Israeli military strike sa Palestinian Gaza Strip sa sulod sang 48 oras suno sa Palestinian medics.
11 ka bulan sa gyera, napaslawan gihapon nga makuha ang kasugtanan sa ungkat-putukan para tapuson ang laban kag ang pagpahilway sa mga Israeli kag dayuhan nga bihag nga hawid sa Gaza.
Ang airstrikes sa duha nga anay eskwelahan nga ginatiniran sang mga nag-evacuate nga sibilyan, isa sa Gaza City kag isa sa Jabalia, ang nagpatay sa indi magnubo sa 12 ka tawo.
Suno sa militar sang Israel, target sang mga pag-atake ang mga armado nga Hamas nga naga-operate sa compound. Lima pa ka tawo ang napatay sa isa ka pag-atake sa isa ka balay sa Gaza City, kun sa diin nagresulta sa kabug-usan nga 28 katawo ang napatay sang Sabado.
Pahayag naman sang armed-wings sang grupo nga Hamas, Islamic Jihad kag Fatah nga nakigbato ang mga sa pwersa sang Israeli sa bilog nga Gaza gamit ang mga anti-tank rocket kag mortar bomb, kag sa pila ka mga insidente, nagpalupok man sang mga bomba agud targeton ang mga tangke kag iban pa nga salakyan sang grupo.
Padayon ang binasolay sang magkatuhay nga grupo sa kapaslawan sang mga mediators, kalakip ang Qatar, Egypt kag Estados Unidos, nga magbuligan para sa ungkat-putukan.
Sa karon, nagahanda na ang US nga mag-atubang sang isa ka bag-o nga panukala. Suno kay CIA Director William Burns, chief sang US negotiator, sa isa ka event sa London, isa nga mas detalyado nga panukala ang pagahimuon sa mga masunod nga adlaw.
