ROXAS CITY – Pilason ang isa ka 62-anyos nga babayi matapos nga ma-side swipe sang isa ka salakyan sa Brgy. Malocloc Sur, banwa sang Ivisan.
Ginkilala ang biktima nga si Nita Unating, residente sang Brgy. Cabugao sang nasambit nga banwa.
Sandig sa impormasyon nagikan sa Ivisan Municipal Police Station, nga tuyo kuntani nga magtabok sang biktima sa karsada apang hinali nalang ini na-side swipe sang isa ka Isuzu Crosswind nga salakyan nga ginamaneho ni Jomar Solano, 36-anyos residente sang Brgy. Dapdapan banwa sang Sapian.
Gilayon naman nga ginpadangat ang biktima sa pinakamalapit nga ospital agud mahatagan sang nagakaigo nga pagbulong. Samtang, ginkustodiya naman sang Ivisan PNP ang nasambit nga driver kag ang salakyan para sa dugang nga imbestigayon.
