66 anyos nga lalaki, nasapwan-patay sa kasagingan sa Brgy. Jumaguicjic

ROXAS CITY – Patay na sang nasapwan ang 66 anyos nga lalaki sa Jumaguicjicville sa Barangay Jumaguicjic, Roxas City.

Ginkilala ang biktima kay Buenvinido Ducanes, residente sang nasambit man nga lugar.

Sa interview sang Bombo Radyo kay Punong Barangay Ma. Ligaya Condez, ginpahayag sini nga base sa panaysayon sang pamilya, una nga nagpadulong sa iya kasagingan sa ila nga uyapad ang biktima.

Didto kag ginkatingala sang iya pamilya nga wala pa ini makapauli rason nga ginpadulungan ini sang iya apo.

Didto kag nakit-an na lamang ini nga nagakulob kag wala na sang kabuhi.

Gindala pa ini sa ospital apang gindeklarar nga dead-on-arrival.

Nagapati naman ang pamilya nga posible gin-atake sang hapo ang biktima nga nagresulta sa iya kamatayon.