ROXAS CITY – Natalana nga pasakaan sang panumbungon nga paglapas sa RA 9165 ukon Comprehensive Dangerous Drugs Act of 2002 ang isa ka 32-anyos nga drug personality matapos nadakpan sa ginkasa nga drug buy bust operation sang gintingub nga puwersa sang Provincial Drug Enforcement Unit (PDEU) sang Capiz Police Provincial Office kag Station Drug Enforcement Unit (SDET) sang Roxas City Police Station sa New Road, Barangay Banica, Roxas City.
Ginkilala ang nadakpan nga si John Kirk Amoroso sang Bangbang Street, Barangay 2, sining syudad.
Narekober sa posesyon ni Amoroso ang 11 ka sachets sang ginpatihan shabu, 500 pesos nga marked money, pouch nga may sulod nga P2805, P5500 nga boodle money kag isa ka motorsiklo.
Sa pagpangusisa sang Bombo Radyo, gin-aku sang suspek nga nagagamit ini sang ilegal nga droga apang ginpanginwala nga gikan sa iya ang narekober nga mga shabu.
Nahibaluan pa nga sang nakaligad nga bulan sang Hulyo 2019 lamang nakaguha sa presuhan si Amoroso pinaagi sa plea bargaining agreement.
Suno naman kay Police Lieutenant Mark Anthony Garcia, team leader sang PDEU, madugay nila nga gin-monitor ang ilegal nga aktibidad ni Amoroso antes ginkasa ang nasambit nga operasyon.
Sa karon, nakahunong na sa karsel sang Roxas City Police Station ang amo nga drug suspek
