ROXAS CITY – Bukas ang chairman sang committee on appropriations sa ginahinyo ni second district board member Atty. Eleuper ‘Bulilit’ Martinez nga himay-himayon kag diskusyonan ang resolusyon nga igapapasar karon sa session, nga magarekomendar nga magpasaka sang nagakaigo nga panumbungon batuk kay Governor Esteban Evan Contreras, Provincial Administrator Edwin Chinel Monares kag OIC sang Roxas Memorial Provincial Hospital (RMPH) Dr. Edmarie Tormon.
Ini ang ginpahayag ni board member Jonathan ‘Sonny’ Besa, chairman sang committee on appropriations sang Sangguniang Panlalawigan, sang mainterview sang Bombo Radyo.
Ginklaro man sini nga ang pagbalay sang amu nga resolusyon ang ginkasugtanan sang tanan nga miyembro sang komitiba kag indi ini iya lamang desisyon.
Ginpanindugan man sini nga nagdesisyon sila nga magdihon sang nasambit nga tikang bangud sa kapaslawan sang executive department ilabi na sang nasambit nga mga opisyal nga magsumiter sang ginahinyo nga dokumento sang Sanggunian.
Pagpunto ni Besa nga hustisya kag transparency gid lamang ang luyag nila nga mga provincial board ang maangkon sang mga pumuluyo sang Capiz.
Pagahiwaton ang session sang Sangguniang Panlalawigan karon sa hapon, adlaw sang Martes.
