Gintay-og sang 7.0 magnitude nga linog ang Taiwan mga 30 kilometers northeast sang Yilan sang Sabado sang gab-i, Disyembre 27.
Suno sa Taiwan Weather Administration, nabatyagan ang linog sa northern Taiwan, lakip na ang kapital nga Taipei, nga naglab-ot sa intensity level four, nga posible nagtuga sang gamay nga kahalitan.
Suno sa Taiwan Fire Department, wala pa sang may nareport nga lapnagon nga kahalitan kag wala pa sang tsunami alert nga gin-isyu. Apang, masobra 3,000 ka panimalay sa Yilan ang temporaryo nga wala sang kuryente suno sa report sang Taiwan Power Company.
Gin-anunsyo naman sang Taiwan Semiconductor Manufacturing Company ukon TSMC nga ang pila sang ila mga pasilidad sa Hsinchu Science Park temporaryo nga gin-evacuate bilang paghalong, apang ang mga empleyado gintugutan sang ulihi nga magbalik sa trabaho pagkatapos nga masiguro ang kaluwasan sang mga pasilidad.
Nabatyagan man ang pagtay-og sa Hong Kong sa diin nakabaton sang masobra 100 ka report ang Hong Kong Observatory.
Ini man ang pinakamabaskog nga linog sa Taiwan halin sang Abril tuig 2024, sang nag-igo ang 7.2 magnitude nga linog sa Hualien nga nagpatay sang 19 ka tawo kag masobra 1,000 ka iban pa ang napilasan.
