ROXAS CITY – Pito sa walo ka mga mayoralty candidates sa Roxas City ang nagtambong sa Debate sa Bombo 2019 nga ginpatigayon sa broadcast center sang Bombo Radyo Roxas.
Kalakip sa mga mayoralty aspirants amo sanday Mercedes ‘’Cheding’’ Bermejo, anay City Vice Mayor Atty. Ronnie Dadivas sang Liberal Party, Francis ‘’Toto’’ Amado Lim ng Hugpong Ilonggo sa Pagbag-o (HIP), anay public administration professor kag chief administrative officer sang anay Panay State Polytechnic College kag karon Capiz State University Dr. Oliva Bataan, Engineer Edmund Sia, anay City Disaster Risk Reduction and Management Office Action Officer Rommel Lastimoso kag Domingo Belonio.
Sa nasambit nga debate ginhatagan sang tion ang mga kandidato nga mapresenta ang ila nga plataporma de gobyerno para mapalab-ot sa publiko ang ila mga plano sa tion nga mapahamtang bilang alkalde sang Roxas City.
Ginsabat man sang mga mayoralty candidates ang pila ka mainit nga issue nga ginapangatubang sang Roxas City kag kun ano ang ila nga ginahimo para masolusyunan ang problema sa iligal nga droga, basura kag kriminalidad.
Samtang nangin sentro sang debate ang pagpabati bati sa isa kag isa nanday Atty. Ronnie Dadivas kag Rommel Lastimoso, sa diin off air naga-insultuhanay ang duha, apang nag-apelar ang isa ka mayoralty candidate nga si Belonio nga untatan na ang paghabuyanay sang isyu kag hulaton na lamang ang desisyon sang publiko kun sin-o ang ila nga botohon sa May 2019 midterm elections.
