ROXAS CITY – Arestado ang pito ka mga indibiwal sa magkatuhay nga kabanwahanan sa Capiz matapos nga gindakop sang mga kapulisan bangud sa paglapas sa ginapatuman nga curfew hours sa probinsiya.
Una diri, naaresto sa banwa sang President Roxas sanday Noel Almendral 25-anyos kag Joel Garcia 45-anyos nga lunsay mga residente sang Barangay Ibaca sang amo nga banwa.
Ginapahayag nga nagbato kag wala nagpati sa hepe sang Pres. Roxas Municipal Police Station ang duha kun sa diin nagpadayaw pa nga mga miyembro sang 4P’s.
Bangud diri, natalana nga pasakaan sang nagakaigo nga panumbungon ang nasambit nga mga persona.
Samtang, lima ka mga indibidwal naman ang nadakpan kasunod sang paglapas sa ginapatuman nga curfew hour sa banwa sang Panitan, Capiz.
Ginkilala ang mga nadakpan nga sanday Diobert Ditoon 34-anyos sang Barangay Cagapagao; Stephen John Biclar 28-anyos sang Barangay Cogon; Mark Anatalio 22-anyos kag Rolly Anatalio nga lunsay mga residente sang Barangay Poblacion Ilaya kag Gerald Sibug 44-anyos sang Barangay Tincopon sang amo nga banwa.
Mahibaluan nga ginapatuman sa karon sa bilog nga probinsiya sang Capiz ang curfew hours humalin alas 8 sa gab-i tubtob alas 5 sa aga base sa Executive Order No. 11, series of 2020 nga ginpapanaog ni Capiz Governor Esteban Evan Contreras.
