Luwas na ang pito ka mga mangingisda nga sakay sang tatlo ka mga sakayang pangisda matapos nakasampay sa baybayon sang Barangay Cantil, Balud, Masbate.
Ginkumpirma ni Kapitan Bebot Ubidos nga yara na sa evacuation center sang nasambit nga barangay ang mga tripulante nga sanday Robert Donton kag Clen Tulio sang FB Roselyn; Emilio kag Gilbert Donton sang FB Remark kag Jolly Baylon, Jory Donton kag Oscar Apayong sang FB Bon-Bon lunsay mga residente sang Barangay Casanayan, Pilar, Capiz.
Suno sa opisyal nga alas 3 kaina sang kaaganhon sang nagsampay ang nasambit nga mga mangingisda sa baybayon sa diin ginbuligan sila sang mga residete, ginpakaon kag gin-ilisan.
Nahibaluan nga wala sang naluwas nga gamit ang mga mangingisda sa diin isa sa ila nga sakayan pangisda ang totally damaged matapos ginhampak sang mabaskog nga balud dala sang bagyo nga Dante.
Sa karon ginakaayo na nila ang ila nga sakayan pangisda nga ila gamiton sa pagpauli sa Barangay Casanayan, Pilar, Capiz.
