PRESIDENT ROXAS, CAPIZ – Pito ka mga indibidwal ang panibag-o nga narekord nga naglapas sa ginapatuman nga curfew hour sa banwa sang President Roxas, Capiz.
Ini ang base sa nakuha nga impormasyon sang Bombo Radyo sa President Roxas Municipal Police Station.
Ang naglapas nga mga persona amo sanday Mary Jane Diotay, 32 anyos; Rey Maligaya, 25 anyos, lunsay residente sang Gabaldon Street, Poblacion, sang nasambit nga banwa; Jonifer Hao, 44 anyos; John Clint Francisco, 43 anyos; Junede Banico, 54 anyos; Rhollin Bullag, 34 anyos kag Michael Corros, 44 anyos, lunsay mga residente sang Poblacion sang nasambit nga banwa.
Nahibaluan nga lunsay yara sa idalom sang impluwensiya sang makahulubog nga ilimnon ang nasambit nga mga persona sang ginsita ang mga ini bangud sang pagguwa apisar nga may yara sang curfew.
Mahibaluan nga ginapatuman sa karon sa bilog nga probinsiya sang Capiz ang curfew hour humalin alas 9 sa gab-i tubtob alas 4 sa aga bangud sang coronavirus disease (COVID-19) pandemic.
