Nagpreparar na ang Bureau of Jail Management and Penology (BJMP) para sa palaabuton nga eleksyon sa Mayo 12 subong nga tuig.
Suno kay BJMP Spokesperson Jsupt. Jayrex Joseph Bustinera, sa karon may kabug-usan nga 31,750 ka mga preso ang magaboto sa sining palaabuton nga eleksyon.
Ini nga numero naghalin sa kabug-usan nga populasyon sang 115,791 ka mga detenido nga mga persons deprived of liberty (PDL’s) sa bug-os nga pungsod.
Ginpahayag ni Bustinera nga 393 ka mga pasilidad sang ila talatapan ang pagagamiton nga Special Polling Precincts para sa mga PDL, buot silingon indi na kinahanglan nga maggwa ang mga botante kag ang pagboto ang pagahiwaton lamang sa sulod sang nasambit nga mga pasilidad.
Sa karon may kabug-usan nga 464 ka mga PDL sa idalum sini nga polisiya, suno sa mando sang Commission on Elections kag sang Department of the Interior and Local Government (DILG).
Samtang, ginapahanugutan na karon ang mga PDLs nga magboto sa tanan nga kandidato, lokal man ukon nasyonal nga posisyon, nga nagsugod sang 2022 elections.
Dugang pa ni Bustinera, ginpahanugutan na sang Comelec, base sa ila ginpagwa nga resolusyon nga ang pagboto sang PDL sa mga kandidato sa national level para sa patas nga voter turnout kag mas matawhay nga proseso sang pagboto.
