Pilason ang 75 anyos nga babaye matapos nabungguan samtang nagatabok sa banwa sang Panitan.
Ginkilala ang biktima kay alyas Lucy residente sang barangay Cala-an banwa sang Panitan samtang ang driver sang traysikol amo si alyas Porterio 46-anyos, manugbaligya sang isda kag residente sang Santa Cruz, Dumalag Capiz.
Sa impormasyon nga nakuha sang Bombo Radyo nagikan sa Panitan Municipal Police Station, ginpahayag sini nga samtang nagatabok sa dalanon ang amo nga biktima sang hinali ini nga ginbungguan sang nagapadulong nga tricycle nga ginamameho ni alyas Porterio nga padulong kuntani sa banwa Estacia Iloilo.
Gilayon man nga gindala ang amo nga biktima sa Capiz Memorial Provincial Hospital para sa nagakaigo nga pagbulong samtang boluntaryo nga nag surrender ang suspek sa mga katapo sang kapulisan.
Sa karun yara na sa kustodiya sang Panitan MPS ang driver sang tricycle para sa nagakaigo nga disposisyon.
