ROXAS CITY – Opisyal na nga ginbuksan pinaagi sa Misa ang ika 75 ka tuig nga jubileo sang Archdiocese sang Capiz nga gihiwat sa Immaculate Conception Metropolitan Cathedral sa syudad sang Roxas, Hulyo 11.
Sa interview sang Bombo Radyo kay Msgr. Rufino Regie Pamposa, Vicar General sang Archdiocese sang Capiz,ginsuguran ini sa pagpakita sa publiko ang opisyal nga logo sang selebrasyon nga naga pamatuod sa maragtason nga selebrasyon nga nagasimbolo sang manggaranon nga pagpanglakaton bilang isa ka lokal nga Simbahan sa Capiz.
Ginpakigbahin man ni Msgr. Pamposa ang mensahe sa homiliya ni Most Rev. Victor B. Bendico, D.D., Arzobispo sang Capiz, gin-agda sini ang tanan nga mga tumuluo nga mangin kabahin sang sini nga jubileo sa padayon nga pag amlig sa pagtuluohan sang kristitanong katoliko kag pagbantala sa maayo nga pinamatasan sang isa ka sumulunod ni kristo.
Dugang ni Msgr. Pamposa magalawig ang amo nga selebrasyon sang jubileo tubtob sa Hulyo 14, masunod nga tuig kag sa manuhay tuhay nga hilikuton sa simbahan pakdto sa mga kristitanong katilingban.
Ginpasalamatan man ni Msgr. Pamposa ang mga kaupdanan nga kaparian kag mga maalwan nga tumuluo humalin sang una tubtob subong nga nangin kabahin sa pagpalapta sang mensahe sang manluluwas sa bug-os nga simbahang katolika.
