Palaligban sa gihapon ang ginaalegar pagkadula sang walo ka tuig nga bata nga babaye sa sulod na sang masobra isa ka semana sa Barangay Aglanot, Dumarao, Capiz.
Ang missing nga bata amo si ‘alyas Rona’ kag residente man sang nasambit nga barangay.
Sa interview sang Bombo Radyo kay Police Captain Tobias Garfin, hepe sang Dumarao Municipal Police Station, iya ginpahayag nga ligom dulom sa gihapon ang ila talatapan sa pagkadula sang nasambit nga bata.
Suno kay Garfin, sa pagbalik nila sa lugar agud magpangita pa sang dugang nga lead, lain-lain na nga mga impormasyon ang ginpatpat sang ginikanan sang bata rason nga mabudlay sa kapulisan nga hatagan sang maathag nga imbestigasyon ang ginaalegar pagkadula sang bata.
Pahayag pa niya, padayon sa gihapon ang pag-imbestigar sang kapulisan sa bulig sang barangay council sang Barangay Aglanot agud madasig nga masolbar ang nasambit nga pagkadula sang bata.
Nagpanawagan man ini sa publiko nga sa ti-on nga may yara sang imposmasyon sa ginapahamtangan sang bata, makig-angot gilayon sa mga kapulisan.
Interviewed by: Bombo Jessa Mae Delos Santos via Bombohanay Bigtime
