ROXAS CITY, CAPIZ – Mas ginpasangkad sang Provincial Health Office (PHO) sang Capiz ang kampanya batuk sa dengue matapos matumod ang walo sa mga barangay sa probinsya nga naka-record sang clustering sang kaso sang nasambit nga sakit.
Sa interview sang Bombo Radyo Roxas kay Capiz Provincial Health Officer II Dr. Ramon Alex Nolasco, iya ginpahayag nga base sa Provincial Dengue Case Bulletin para sa morbidity week 27, nagaguwa nga padayon nga nagataas ang kaso sang dengue sa mga pili nga lugar sa probinsya.
Suno kay Nolasco, kalakip sa mga barangay nga ginakabig nga may clustering of cases, ukon mga barangay nga wala nagnubo sa tatlo ka kaso sang dengue sa sulod sang apat ka asud-asod nga semana amo ang Barangay Agambulong sa banwa sang Jamindan; kag mga barangay sa Baybay, Bolo, Cagay, Culasi, Punta Tabuc, Tanque kag Tiza diri sa Roxas.
Paathag sang opisyal, ang pag-cluster sang mga kaso ang indikasyon nga padayon nga nagatiyog ang dengue virus sa komunidad kag kinahanglan ang gilayon nga aksyon agud mapunggan ang labi pa nga pagdamo sini.
Base pa sa listahan sang PHO, naglab-ot na sa 816 ang kabug-usan nga kaso sang dengue sa bilog nga Capiz halin Enero 1 tubtob Hulyo 5, 2025.
Ini ang mas mataas sang 26.32 percent kumpara sa 646 nga kaso nga nalista sa kapareho nga period sadtong nakaligad nga tuig.
Bangud sini, liwat nga nagpahanumdom si Dr. Nolasco sa publiko nga indi mangin kampante kag siguruhon nga malimpyo ang palibot, gub-on ang mga posible nga istaran sang lamok kasubong sang mga kariton, lata, paso kag mga istakan sang tubig.
